జైలు నక్షత్రాలు

దేశంలో ధరల్లానే అవినీతి పెరిగిపోయి, ఆ అవినీతి కాస్తా బద్ధలై - బోల్డన్ని కుంభకోణాలూ, కుంభకోణానికి కనీసం ఆరుగురు చొప్పున కొత్త ఖరీదైన ఖైదీలూ తయారయ్యారు. అసలు కసబ్ ని జైల్లో పెట్టి మేపుతున్నారు - అదీ ఇదీ అంటున్నారు. ఇండియన్ జైల్లో ఉంచడమే వాడికి తగిన శిక్ష. చావు కన్న ఘోరం ఇండియన్ జైలు లో జీవితం ! ఇండియాలో జైళ్ళు మహా ఘోరం - దరిద్రం - చండాలం - వగైరా అని చెప్పి చాలా మంది మనీషులు బాధ పడుతున్నారు. లేటు గా - అంటే తెలుగులో లేటెస్టు గా మన దేశంలో నేరాలు చేసి, ఫారిన్ పారిపోతే సుఖం. ఎంచక్కా, ఒక వేళ దొరికి పోయినా, ఫారిn లో సౌకర్యంగా వుండే జైళ్ళలో వుండొచ్చు. ఇండియాలో అలాంటి ఫెసిలిటీలు లేవు కాబట్టి - మేము రాం అంటున్నారు నేరస్థులు. సీ.బీ.ఐ. ని ముప్పతిప్పలు పెడుతున్నారు. వార్ రూం లీక్ కేసులో రవి శంకరన్ గారూ, పురూలియా లో ఆకాశంలోంచీ ఆయుధాలు వెదచల్లిన కిం డేవీ గారూ - ఇండియా లో జైళ్ళు బావుండవనీ, దైచేసి మమ్మల్ని అక్కడికి మాత్రం పంపించకండని - ఇంగ్లండు లో పిటిషన్లేసేరంట.

మొన్నామధ్య జైళ్ళలో మన ప్రముఖులంతా ఏం చేస్తున్నారూ అని ఒక వ్యాసం రాసేరు వీక్ వాళ్ళు. ఏం చేస్తారు ? మనూ షర్మ గారు తీహార్ జైల్లో బేకరీ నడుపుతున్నారు. కనిమోళి అమ్మ గారు కవితల్రాస్తున్నారు. పుస్తకాలు చదువుతున్నారు. రాజా గారూ, భృత్యులూ, కల్మాడీ గారూ బాట్మింటన్ ఆడుకుంటున్నారు. ఇవన్నీ కబుర్లు బావున్నాయి. కొందరు పెద్దలు జైలు చూసి డిప్రెస్ అయ్యారంట. వాళ్ళని అర్జంటు గా counsel (console) చెయ్యల్సి వచ్చిందంట. నేరం (White Collar?!) చేసినపుడు కలగని భయం జైల్లో గడపడానికి కలుగుతుంది. కానీ ఆ డిప్రెషను మరీ పరిధి దాటితే శారీరక మానసిక రుగ్మతలకి గురవుతారు కాబట్టి ఇదీ ఆలోచించదగ్గ విషయమే !

రిలయన్స్ అడాగ్ (ADAG) ఎం.డీ. గార్ని అనిల్ అంబానీ గారు కలవడానికి వస్తారు. కనిమోళి నీ, రాజా నీ కలవడానికి కరుణానిధి గారు వెళ్తూ ఉంటారు. అక్కడ సౌకర్యాలూ అవీ ఎలా వున్నాయో మరి. అపుడెపుడో సల్మాన్ ఖాన్ గారు మనుషుల్నో, దుప్పుల్నో చంపినపుడు ఒక రాత్తిరంతా జైలో వేసేరు. రాత్రి మొత్తం దోమలు కుట్టి కుట్టి చంపాయంట. ఒక్క రాత్రి కే ఆయనకీ, వాళ్ళమ్మ గారికీ కళ్ళలో నెత్తురొచ్చింది. జైల్ లో సెల్ ఎంత దరిద్రం గా వుంతుందో 'The Week' వారు వెల్లడించారు. అయితే లక్కీ గా, సెల్ శుభ్ర పరచడానికి పెద్ద వాళ్ళు (హైక్లాస్) చిన్న వాళ్ళని కొంత భత్యాన్నిచ్చి పెట్టు కోవచ్చంట. అంటే వారానికి మీకు జైల్లో ఉంచుకోనిచ్చే 850 రూపాయల్లో ఈ (లో క్లాస్) చిన్న ఖైదీలకి డబ్బులిచ్చి రూం శుభ్రం చేయించుకోవచ్చు, సిగరెట్లు తెప్పించుకోవచ్చు వగైరా.

జైలు సంస్కరణలూ, ఓపెన్ జైళ్ళూ అంటూంటారు కదా - పని లో పని గా కొంచెం ఖరీదైన వీ.అయి.పీ లను ఉంచదగిన - ఇలాంటి స్టైలిష్, పోష్ నేరగాళ్ళని ఉంచడానికి సకల సదుపాయాలతో కొన్ని పోష్ - కార్పొరేట్ స్టైలు జైళ్ళు కట్టొచ్చు కదా. అపుడు అందరికీ బావుంటుంది. రవిశంకరన్ గారి లాంటి పోష్ నేరస్థులని జాగర్త గా మన దేశం తెప్పించుకుని దర్యాప్తు జరపవచ్చు.

ఇలాంటి 'స్టార్' నేరస్థులకి 'స్టార్' సదుపాయాలు ఇవ్వాలి. ముళ్ళపూడి వారన్నట్టు - చట్టం ముందు అందరూ సమానమే. కొందరు ఇంకొంచెం ఎక్కువ సమానం. ఇన్నాళ్ళూ ఏ ప్రధానమంత్రో, హోం మంత్రో 'చట్టం తన పని తాను చేస్తూంటుంది - ' అని స్టాండర్డు డైలాగు కొడితే వింటున్నాం కదా. అలా చట్టం ఎంత సేపయినా పని చెయ్యనీ - అంత సేపూ ఈ చట్టానికి చుట్టాల్ని కొంచెం ఆదరం గా చూడాలి కదా. కనీసం అప్పుడు ప్రపంచ దేశాల ముందు మన పరువు దక్కుతుంది. ఇలాంటి సాకులు కూడా తగ్గుతాయి.