ఇంటికో కోతి

అబ్బ ! ఈ నాటి ఇంటింటి రామాయణంలో బంధువులతో అంటీ ముట్టనట్టుండడం ఒక కళ. ఈ కళ అందరికీ వొంటబట్టదు. కొందరు ఎవాయిడ్ చేస్తే ఏ సమస్యా లేదు అనుకుంటారు (నా లాంటోళ్ళు) కానీ ఎవాయిడ్ చెయ్యడం కుదరదు. మాకో బంధువు ఒకావిడ ఉంది. మా అత్తారింట్లో ఆవిడది ఒక ప్రత్యేక స్థానం. ఆవిడంటే అందరికీ భయమూ, భక్తీ, హాస్యం (హేళన కాదు) వగైరాలు. నిజానికావిడ వయసులో మా అందరికన్నా చిన్నది. కానీ నోటి లో పెద్దది.

లొడ లొడ లొడ లొడా వాగుతూ, 'చెప్పేవాళ్ళకి వినేవాళ్ళు లోకువ' అన్న సామెత ను నిజం చేస్తూ, అందర్నీ ఉచిత సలహాలతో బోంబార్డ్ చేసేస్తూ - తల వేడెక్కించడం ఆవిడ హాబీ, బలహీనతా... సిగ్నేచర్ అన్నీనూ. వొంటలు బ్రహ్మాండం గా చేస్తుంది. నేను అసూయ చెందేందుకు చాలా సరకు ఉంది. అందం, చేతి లో మేజిక్, వగైరా. కానీ ఆ మాటల వేటే భరించడం కష్టం.

ఒకేసారి కోతి తలకీ తోకకీ నిప్పెట్టినట్టు - చికాకేయించేలా మాట్లాడడం వల్ల అందరికీ ఆప్తురాలు. నేను నోరు మూసుకుని కూచుంటానని మా అత్తగారి కంప్లైంట్. ఇంట్లో ఉన్నంతసేపూ వాగడం నా వల్ల కాదు. ఇందుమూలానా నేను బేడ్ కోడలినాయె. ఈ లెక్క ప్రకారం సదరు హీరోయిన్ - మా అత్తగారికి కడు ఆత్మీయురాలు. అందరి విషయాలూ ఈ బీ.బీ.సీ కి తెలుసు. వాళ్ళెవరో వాళ్ళ వేలు విడిచిన మేనత్త నాల్గో కోడలు ఇంట్లో సంగతులూ, వాళ్ళెదురింటావిడ వియ్యపురాలి నాలుగో మనవడు లండన్లో ఎవరో అమ్మాయి వెనక పడటం దగ్గర్నించీ, ఇంట్లో పనిమనిషి సీత మొగుడి సినిమా టికట్ల బిజినెస్సూ - అన్నీ కరతలామకం (సరైన పదమేనా?) అసలిలాంటి బీ.బీ.సీ. లూ, ఆల్ ఇండియా రేడియోలూ, సీ.ఎన్.ఎన్ లూ ఇంటికోకరు ఉంటారనుకుంటాను. వీళ్ళకి అందరి వార్తలూ మిగిల్న అందరికీ రిలే చెయ్యక పోతే తోచదు. పనిలో పని గా వార్తలకు మసాలా దట్టిస్తుంటారు. లేని వార్తలు సృష్టిస్తుంటారు. ఇదో జబ్బు ! వీళ్ళు కోలుకుంటారనుకోవడం కల్ల.

ఇంతకీ నా కడుపుమంటేంటంటే, లేటెస్టుగా ఈమె నాకూ, మా కావల్సిన వాళ్ళకీ మధ్య పెట్రోలు పోసి మంట పెట్టింది - కానీ విజ్ఞులం కాబట్టి, పెట్రోలు రేటు దృష్టి లో పెట్టుకుని ఇప్పుడిప్పుడే మంటల్ని ఆర్పుకుంటున్నం. కానీ ఈ వీకెండు సెలవల్లో నేను తప్పనిసరి పరిస్థితుల్లో ఆవిడింటికే వెళ్ళాల్సి రావడం గుండెల్లో రాయి పడేలా చేసింది.

ఈ గండం గట్టెంకించమని అమ్మవారికీ అయ్యవారికీ దండాలు పెట్టుకుంటున్నా ! ఈ వెర్బల్ డయేరియాని 'పోనీలే ! తన మనసు మంచిది!!' అని ఇన్నాళ్ళూ భరిస్తూ వచ్చినా, కొన్ని కారణాల వల్ల ఆవిడ కావాలనే ఇక్కడి విషయాలు అక్కడా, అక్కడ సంగతులు ఇక్కడా చేరవేయడం మాత్రమే కాక, ''తగూలూ తంటాలూ'' సృష్టించి వినోదిస్తూందని, తర్కించి, తెలుసుకుని, ఆవిడకి ఎలా సమాధానం ఇవ్వాలా అని ఆలోచిస్తున్నా.

కానీ లైఫ్ డైలీ సీరియల్ కాదు. ఒకరన్న మాటకి చెంప చెళ్ళు మనిపించేలా సమాధానం ఇవ్వడం నాకు చేత కాదు. కనీసం 'నొప్పింపక తానొవ్వక ' తరహా లో కూడా ప్రవర్తించకపోతే కష్టం. ఎప్పుడూ నేనే నొచ్చుకోవడం అనే విష్యాన్ని కొన్ని రోజులు ఆపాలి. ఆవిడకి ఈ సారి గుణపాఠం చెప్పాలి. కానీ ఆవిడకి (వాళ్ళింటికి నేనెళ్ళి ఎలా బుద్ధి చెప్పడం ?!)స్థానబలం వుంటుంది కనక & తోలు మందం కనకా - చాలా కష్టం. ఫ్రెండ్ అయితే, అసూయా, ద్వేషం, కోపం లాంటివి పుట్టవు. బంధువు కావడం తోటే తంటాలన్నీ. ఇబ్బంది పెట్టే ఈ బంధుకోతులందరూ డౌన్ డౌన్. 'అంటీ ముట్టకుండా' కన్నా, 'అంటుతూ, అంటిస్తూ' ఉండడం నేర్చుకోవాలేమో నేను.